Share This Article
Porta e parë për të marrë shërbim shëndetësor për çdo pacient është mjeku i familjes. Marrdhëniet mjek- pacient duhet të bazohen në rregulloren , e cila është e afishuar në çdo qendër shëndetsore.
Mungesa e informacionit mbi të drejtat dhe përgjegjësitë e pacientit , ndonjëherë ka çuar në veprime të gabuara, duke u fokusuar tek grindjet dhe kalimin në plan të dytë të sëmundjes.
Në vitin 2002 kjo rregullore u përsos më tej, bazuar në Kartën Europiane të pacientit.
Gjej rastin të sjell në vëmendje detyrat dhe të drejtat që ka pacienti dhe mjeku në marrëdhëniet midis tyre.
Shpesh , keqkuptimet vijnë si pasojë e mungesës së informacionit, të etikës ose mosrespektimit të rregullave që janë vendosur.
TË DREJTAT E PACIENTIT
– Të ketë akses për shërbim shëndetësor
-Të ketë besueshmëri
-Të jetë i informuar
-Të referohet për vizitë më të kualifikuar kur ka nevojë
-Të zgjedhë mjekun e familjes në kujdesin parësor një herë në vit
-Të marrë pjesë në vendimmarrje lidhur me shëndetin e tij
-Të trajtohet nga personel mjek/infermier të kualifikuar.
Të ketë dijeni mbi skemën e sigurimit të tij shëndetësor
-Të ketë të drejtë dhe të dijë se ku të ankohet për shërbimin shëndetësor që i ofrohet.
Çdo individ ka të drejtën e shërbimit të duhur për të parandaluar sëmundjen.
PËRGJEGJËSITË E PACIENTIT
-Të bëjë një jetë të shëndetshme
-Të kujdeset dhe të mbrojë
ambientin ku jeton
-Të respektojë të drejtat e pacientëve të tjerë dhe të personelit mjekësor
-Të përdorë në mënyrë optimale dhe të mos abuzojë në sistemin shëndetësor
-Të njohë shërbimet shëndetësore që i ofrohen atij në nivel lokal dhe kombëtar.
-Të informojë në mënyrë korrekte personelin shëndetësor nëse i kërkohet informacion për diagnozën, trajtimin, këshillimin ose rehabilitimin e tij
-Të këshillohet dhe të pranojë procedurat e trajtimit mjekësor dhe rehabilitimit të tij fizik
-Të interesohet për koston dhe mënyrën e pagesave të mundshme.
Marrëdhëniet që ndërton mjeku me pacientin bazohen mbi një kod të sjelljes dhe etikës profesionale mjekësore.
Deontologjia mjekësore është një bashkësi principesh dhe rregullash
që duhen respektuar në praktikën e përditëshme.
DETYRAT E MJEKUT NDAJ TË SËMURIT
Mjeku duhet të kujdeset për mirëqenien shëndetësore të pacientëve të tij. Marrëdhëniet midis tyre duhet të mbështeten në mirëbesimin e ndërsjelltë. Zgjedhja e lirë e mjekut dhe e institucionit të mjekimit nga i sëmuri, përbën parimin themelor të këtyre marrëdhënieve.
Kompetenca profesionale:
Në ushtrimin e profesionit të tij mjeku duhet të angazhohet në kujdesin për fëmijët, pleqtë dhe handikapatët, sidomos kur vëren se ambjenti familjar ose jashtëfamiljar ku jetojnë ata, nuk kujdesen në mënyrë të mjaftueshme për shëndetin e tyre.
Informimi i të sëmurit:
-Mjeku duhet të informojë të sëmurin për ecurinë e ekzaminimeve dhe të llojit të mjekimit,
– të japë parashikime duke i bërë të ditur të sëmurit të mirat dhe të këqiat, për të marrë së bashku vendimin më të drejtë të trajtimit më të mirë.
Në rast se i sëmuri është nën moshë për të gjykuar në mënyrë të pavarur ose i paaftë mendërisht, mjeku është i detyruar të marrë vendimin e familjes ose kujdestarit dhe kur kjo është e pamundur, të veprohet nën përgjëgjësinë e konsultës mjekësore.
I sëmuri ka të drejtë të dijë të vërtetën mbi sëmundjen e tij dhe të njihet me të gjitha rezultatet e analizave dhe dokumentat e tjera mjekësore. Megjithatë, nëse mjeku e gjykon që kjo vënie në dijeni dëmton shëndetin e të sëmurit, atëhere ai nuk është i detyruar t’a informojë atë për të vërtetën apo t’i tregojë dokumentacionin mjekësor.
Është detyrë morale e mjekut të tregojë mirëkuptim dhe bashkëshqetësim me familjarët e të sëmurit dhe t’i mbajë ata në dijeni për ecurinë e gjendjes së të sëmurit. Ky bashkëpunim është në të mirën e të sëmurit.
Mjeku duhet t’i garantojë të sëmurit përkushtim dhe kompetencë profesionale.
Pra, nëse ka komunikim, etikë dhe transparencë nga të dy palët, kjo do të ndihmonte kurimin më të mirë të sëmundjes.
Nëse rezultatet e mjekimit nuk arrihen shpejt, ndodh që të transferohet kartela klinike sa në një mjek tek tjetri . Do të ishte gabim nëse më parë të sqarohen problemet në të mirën e përbashkët. Pra këto rregulla të Kartës Europiane të pacientit respektohen nga të dy palët. Në mjekësi thuhet : sëmundja vjen shpejt dhe ikën ngadalë.
Prandaj duhet durim dhe të ndërtohen ura komunikimi mbi bazë argumentesh objektive.
Pacienti është taksapaguesi , pra ka të drejtën t’i kërkojë mjekut detaje për sëmundjen dhe mjekimin e tij. Informacioni i mësipërm ndihmon pacientin për një komunikim më të frutshëm.
Artikull nga dr. Zerina Sheme